Mbunge wa Newala Mjini Mhe. George Mkuchika amekabidhi baiskeli saba za kubebea wagonjwa kutoka fedha za mfuko wa jimbo

Posted on: February 23rd, 2022

Mbunge wa jimbo la Newala mjini Mhe. George Mkuchika amekabidhi baiskeli 7 za kubebea wagonjwa zenye thamani ya shilingi milioni 4.13 fedha za mfuko wa jimbo, katika hospitali ya wilaya Newala na kituo cha afya Mkunya zilizopo halmashauri ya mji Newala.

Mhe. Mkuchika ambaye pia ni Waziri Ofisi ya Rais Kazi Maalum amekabidhi baiskeli hizo jana Jumanne februari 22, 2022 na akifafanua kuwa, fedha za mfuko jimbo zimelenga kwenda kusaidia wananchi katika kutatua changamoto ndogondogo zinazowakabili na awamu hii kamati imeamua kusaidia wagonjwa pamoja na wauguzi katika utendaji wao wa kazi.

Hata hivyo Mbunge huyo ameeleza kuwa yapo mafanikio makubwa yaliyopatikana kwenye sekta ya afya tangu ilipoanzishwa halmashauri ya mji Newala mwezi Julai 2015, kwa kujenga zahanati 11 pamoja na nyumba za waganga, kati hizo 9 zimejengwa kwa fedha za ndani na 2 kwa ufadhili ya Japan.

Aidha ameeleza kuwa serikali inawajali wananchi wake na ilishatoa fedha shilingi milioni 500 kujenga Kituo cha Afya Mkunya ambacho kilikamilika na tayari kinatoa huduma na sasa imetoa shilingi milioni 250 kwa ajili ya ujenzi wa majengo ya awali ya kituo cha Afya Nambunga na fedha zingine shilingi milioni 250 kwa ajili ya ujenzi wa kituo cha Afya Nanguruwe.

Akipokea baiskeli hizo Mwenyekiti wa halmashauri ya Mji Newala Mhe. Yusuph Kateule, amesema wananchi wa Newala mji wanamshukuru mbunge wao kwa jitihada zake za kuwaletea maendeleo na baiskeli hizo ni msaada mkubwa kwa kuwa wakati mwingine mazingira yakutolea huduma yalikua sio rafiki kwa mgonjwa na muuguzi.

Naye Mganga Mkuu wa halamshauri ya Mji Newala Dkt. Joseph Fwoma ameishukuru serikali kwa kuwapatia vifaa tiba vya kutosha na vya kisasa hasa katika kituo cha Afya Mkunya ambacho hivi karibuni imepokea vifaa hivyo kutoka wizara ya afya.

Katika mgawanyo wa baiskeli hizo hospitali ya wilaya ya Newala imepata baiskeli 4 na kituo cha Afya Mkunya kimepata baiskeli 3.